బాతాఖాని-లక్ష్మిఫణి కబుర్లు–రణ్

    ఈ మధ్యన చూసిన హిందీ సినిమాల్లో ‘రణ్’,నాకు నచ్చింది.రాంగోపాల్ వర్మ ‘షోలే’ రీమేక్ తీసి, చేతులు కాల్చుకున్నాడు.ఇంక తన పని అయిపోయిందేమో అనుకునేటంతలో,ఈ ‘రణ్’ తో మళ్ళీ రంగం మీదకు వచ్చాడు.ఇలాటి సినిమాలు తెలుగులో ఎందుకు తీయడో అర్ధం కాదు.

    సినిమా కథ అంతా ప్రచార మాధ్యమం అయిన టి.వీ చాన్నెల్స్, వాళ్ళు టీ.ఆర్.పీ లకోసం తినే గడ్డీ, తిమ్మిని బమ్మీ బమ్మిని తిమ్మీ చేయడం గురించి.అది మనం రోజూ చూస్తున్నదే.’రణ్’ లో ఒక టి.వీ. చానెల్,ఒక ప్రభుత్వాన్ని,పడగొట్టి ఇంకో ప్రభుత్వాన్ని, ఎలా అధికారంలోకి తేగలదో, చాలా బాగా చూపించారు.అదీ బాగా ప్రాచుర్యమున్న చానెల్ ఏదైనా ఒక విషయం గురించి చెప్తే, ప్రేక్షకులు,దాని వెనుక ఉన్న నిజానిజాలు తెలుసుకోకుండా, గొర్రెల మందలా ఎలా ప్రభావితులౌతారో చూడొచ్చు.

    ‘హర్షవర్ధన్ మల్లిక్ (అమితాబ్) ఒక టి.వీ. చానెల్ అధిపతి అతని కొడుకు జై ( సుదీప్).వీళ్ళిద్దరూ కలిపి నడుపుతున్న న్యూస్ చానెల్ కి టీ.ఆర్.పీ లు అంతబాగా ఉండవు. కారణం వాళ్ళ న్యూస్ అంతా మరీ ఉన్నదున్నట్లుగా చూపించేయడం వల్ల.అంతా ‘ రాముడు మంచి బాలుడు’ టైపూ. ఇంకో సంగతేమంటే వీళ్ళ ఐడియాలన్నీ, ఇంకో చానెల్ వాళ్ళు తీసేసికుని, వాళ్ళ టి.ఆర్.పీలు పెంచేసుకుంటూంటారు.ఒక పరిస్థితిలో, ఆర్ధికంగా బాగా కష్టాల్లో పడిపోయేదాకా వస్తుంది.ఇలాటి సమయంలో, జై మల్లిక్ గత్యంతరంలేక మోహన్ పాండే ( పరేష్ రావల్) దగ్గరకు వస్తాడు. ఇతను ఓ టిపికల్ రాజకీయవేత్త ఉఛ్ఛం నీచం అనే పదాలు అతని డిక్షనరీలో ఉండవు. తనకి కావలిసిందల్లా పదవి. అది ఎలా వచ్చినా ఫర్వాలేదు. ఇప్పుడు మన రాష్ట్రంలో ఇలాటి రాజకీయ నాయకులకి ఏం కొదవా లేదు.వాళ్ళకి ‘అధికారం’ అల్టిమేట్ టార్గెట్. అదిరావడానికి ఎంత నీచానికైనా దిగజారతారు.మొత్తానికి వీళ్ళ కుటిల తంత్రంతో, అధికారంలో ఉన్న ప్రభుత్వం
పడిపోయి,పాండే ఆల్మోస్ట్ అధికారంలోకి వచ్చేస్తాడు.ఈ లోపులో,పూరబ్ శాస్త్రి (రితేష్ దేష్ ముఖ్) కారణంగా, ఈ వ్యవహారాలన్నీ బయట పడతాయి. చివరగా, అమితాబ్ బచ్చన్ స్పీచ్ తో సినిమా పూర్తి అవుతుంది.

    నటన విషయంలో అమితాబ్ గురించి ఏం చెప్పం? గ్రేట్! ఇంక మిగిలిన వారిలో మొహినీష్ బెహెల్, రజత్ కపూర్, సుచేతా కృష్ణమూర్తీ ఎవరి పరిధిలో వారు చాలా బాగా చేశారు.

    ఈ సినిమా కొంచెం మధూర్ భండార్కర్ స్టైల్ లో ఉందేమో అనిపించింది.రాంగోపాల్ వర్మా సినిమాల్లో ఉండే సస్పెన్స్ ఎక్కడా లేదు.ఈ మధ్యన మన తెలుగు చానెళ్ళలో వచ్చిన కొన్ని సంచలానాత్మక వార్తలు,ఈ కోవకే చెందినవేమో అనిపిస్తూంటుంది.ఒక విషయం ఏమిటంటే, వాటివల్ల ఎవరూ రాజీనామాలూ చెయ్యలేదు, ఏ చానెల్ ఓనరూ మారలేదు,ఎవరూ ఆత్మహత్యలూ చేసికోలేదు ( ఈ సినిమా లో చూపించినట్లుగా !!).వాళ్ళమానాన వాళ్ళు ఒకరికొకరు పోటీగా సెన్సేషనల్ న్యూసులు చూపిస్తూనేఉన్నారు.
ఉదాహరణకి ఈ వేళ కల్కీ స్వామి తన ఆశ్రమంలో చేసే అరాచికాల గురించి వార్త వచ్చింది.దీని ధర్మమా అని టి.వీ-9 టీ.ఆర్.పీలు ఆకాశాన్నంటాయి.
ఏది ఏమైనా, చాలా స్లీక్ గా తీసిన సినిమా ఇది.ఒకసారి తప్పకుండా చూడవలసినది.